Plantun de Prouvènço

Pèr coumpara dos planto d'encò nostre

Festuca violacea & Grimmia orbicularis

Festuca violacea

Poaceae Graminaceae

Nom en français : Fétuque violacée.

Descripcioun :
Aquesto petugo trachis sus li pendis d'auto mountagno mounte èi coumuno emai siegue pas toujour couneigudo. Se recounèis majamen à sis espigueto vióuleto de quàuqui flour que li lemma fan aperaqui 4 à 5 mm. Li fueio soun primo e d'un verd lusènt. A la coupo soun pulèu redouno e se pòu vèire, emé uno forto lùpi, 7 iscloun de scerenchime (pichot poun blanc sus la fotò) .

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 50 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Festuca
Famiho : Poaceae
Famiho classico : Graminaceae

Ordre : Poales

Coulour de la flour : Vióuleto
Petalo : ges
Ø (o loungour) enflourejado : 3 à 13 cm
Flourido : Estiéu

Sòu : Ca (Si)
Autour basso e auto : 1800 à 3000 m
Aparado : Noun
Juliet à avoust

Liò : Pelouso - Prado - Pendis - Esboudèu
Estànci : Subaupen à Aupen
Couroulougi : Ouroufito-Aupenco
Ref. sc. : Festuca violacea Schleich. ex Gaudin, 1808

Grimìo-di-boursèu-redoun

Grimmia orbicularis

Grimmiaceae

Nom en français : Grimmie orbiculaire.

Descripcioun :
Aquesto mousso coumuno dóu gènre Grimmia trachis en couissin gris, sourne e redoun sus li roucas cauquié. Coume quàsi tóuti li mousso dóu meme gènre si fueio soun acabado pèr uno longo ciho ialino. Fai eisadamen d'espouroufite clina que de verd devènon aranjo.

Usanço :
Se destrìo de Grimmia pulvinata, enca mai coumuno, bonodi soun urno redouno (acabado emé uno pouncho pèr Grimmia pulvinata) e subretout au microuscope que si celulo de baso de fueio soun 4 à 8 cop pu longo que larjo (quàsi carrado pèr Grimmia pulvinata). Coumpara emé la grimìo-en-couissin que ié sèmblo proun.